မိခင်ဖြစ်သူကို မပြန်လမ်းပို့ခဲ့သူ သားအလိမ္မာရဲ့ အမှုအကြောင်း - Wu Xieyu - #ep27

ကျွန်တော်တို့တွေ မှုခင်းအကြောင်းအရာတွေ မျိုးစုံကို ပြောပြခဲ့တဲ့အထဲမှာ လင်မယားချင်းဖြစ်ကြတာ၊ မောင်နှမသားချင်းတွေ ဖြစ်ကြတာတွေအပြင် သူစိမ်းသူရံစာတွေ ဖြစ်ကြတာ အစရှိသဖြင့် ပုံစံမျိုးစုံရှိတယ်ပေါ့။ ဒါပေမယ့် မိဘနဲ့ သားသမီးဖြစ်တာကိုတော့ တစ်ခါမှ မပြောဖူးသေးဘူးထင်ပါတယ်။ ပြီးခဲ့တဲ့ တစ်ပတ်က ပြောခဲ့တဲ့အမှုက သားဖြစ်သူက အိမ်ခြေရာမဲ့ကို ကျူးလွန်ခဲ့တဲ့အမှုမှာ အဖေနဲ့အမေက သားဖြစ်သူကို ရဲလက်အပ်ခဲ့တဲ့အမှုဆိုတာကိုတော့ ပြောခဲ့တယ်။ ဒီကနေ့ပြောပြမယ့် အမှုမှာလည်းဘဲ သားဖြစ်သူက မှုခင်းတစ်ခုကို ရက်ရက်စက်စက်ကျူးလွန်ခဲ့တဲ့အကြောင်းကို ပြောပြချင်ပါတယ်။ ဒါပေမယ့် စိတ်မကောင်းစရာက မှုခင်းကျူးလွန်သူဖြစ်တဲ့ သားဖြစ်သူက ကျွန်တော်တို့တွေရဲ့ အသိုင်းအဝိုင်းရဲ့ စံသတ်မှတ်ချက်တွေနဲ့ မှတ်ကျောက်တင်ရမယ်ဆိုရင်ဖြင့် စံပြသားတစ်ယောက်လို ဖြစ်နေတဲ့သူ ဖြစ်နေတာပါ။ စာတော်တယ်၊ ပညာတတ်တယ်၊ မိဘစကားကို မြေဝယ်မကျနားထောင်ခဲ့တဲ့ သားဖြစ်တယ်။ ပိုပြီးတော့ စိတ်မကောင်းစရာက ဒီသားအလိမ္မာဆိုသူ ကျူးလွန်ခဲ့တဲ့ ရာဇဝတ်မှုမှာ အဓိကသားကောင်ဖြစ်သွားသူက သူ့ရဲ့ မိခင်ကိုယ်တိုင် ဖြစ်နေတာပါပဲ။ မိခင်ဖြစ်သူကို ၂၀၁၅ ခုနှစ် ဇူလိုင်လထဲမှာ ဇီဝိန်ခြွေခဲ့တာဖြစ်ပြီး ကြွင်းကျန်ရစ်တဲ့ ခန္ဓာကိုယ်ကို သူ့အမေရဲ့တိုက်ခန်းထဲမှာပဲ ဝှက်ထားခဲ့တာပါ။ ဒီလို ရက်စက်လှတဲ့ မှုခင်းကို ကျူးလွန်ခဲ့တဲ့အပြင် မိခင်ဖြစ်သူဟာ သူနဲ့အတူ အမေရိကားကို လိုက်သွားခဲ့ပါတယ်ဆိုပြီး အမေနဲ့ပတ်သက်တဲ့ အကြောင်းအချက်တွေကို ဆွေမျိုးတွေကို လိမ်လည်ပြောဆိုထားခဲ့ပြီး ဆွေမျိုးတွေဆီကနေ တရုတ်ငွေ တစ်သန်းကျော် လိမ်လည်ခဲ့သေးတာ ဖြစ်ပါတယ်။ ဒါပေမယ့် ၇ လလောက်အကြာမှာတော့ ဆွေမျိုးတွေက သံသယဝင်လာတဲ့အတွက်ကြောင့် သူ့အမေဖြစ်သူရဲ့ တိုက်ခန်းကို ဝင်ရောက်စစ်ဆေးပေးဖို့ ရဲတွေကို တောင်းဆိုခဲ့တဲ့အခါကျတော့မှ အဖြစ်မှန်ပေါ်ပေါက်လာခဲ့ရတာ ဖြစ်ပါတယ်။ အဲ့ဒီတော့ မိခင်ဖြစ်သူကိုတောင်မှ ရက်ရက်စက်စက် ဇီဝိန်ခြွေရလောက်အောင် ဘယ်လိုအကြောင်းအချက်တွေ ရှိခဲ့သလဲ။ စာအရာမှာ ပညာအရာမှာ တော်လွန်းလို့ ပတ်ဝန်းကျင်မှာ စံပြသားဆိုပြီးတော့ အများက ချီးကျူးထောပနာ ပြုရတဲ့ သားအလိမ္မာ သားရတနာလေးက ဘယ်လိုဖြစ်လို့ မိခင်ဖြစ်သူကို အခုလို လုပ်ခဲ့ရသလဲ၊ နောက်ကွယ်က အကြောင်းအချက်တွေက ဘာတွေဖြစ်မလဲဆိုတာကို ဒီကနေ့ ကျွန်တော်တို့ရဲ့ Murder Monday အစီအစဉ်ကနေ တင်ဆက်ပေးသွားမှာပါခင်ဗျာ။ ဒီကနေ့ ကျွန်တော်ပြောပြမယ့် အဖြစ်အပျက်က မိဘနဲ့ သားသမီးကြားမှာ ဖြစ်ပျက်ထားတဲ့ မှုခင်းတစ်ခု ဖြစ်တာကြောင့် ကြည့်ရှုဖို့ရာ အဆင်ပြေမှသာ ဆက်လက်ကြည့်ရှုဖို့ အကြံပြုချင်ပါတယ်ခင်ဗျာ။ အားလုံးပဲ မင်္ဂလာပါခင်ဗျာ။ ကျွန်တော်တို့ရဲ့ Story Bears ပုံပြင်ပြောသော ဝက်ဝံများ Youtube Channel ကနေ ပြန်လည် ကြိုဆိုလိုက်ပါတယ်ခင်ဗျာ။ ကျွန်တော်ကတော့ Polar Bear ပဲ ဖြစ်ပါတယ်ခင်ဗျာ။ ဒီဖြစ်ရပ်က လွန်ခဲ့တဲ့ ကိုးနှစ်တိတိမှာ ၂၀၁၅ ခုနှစ် ဇူလိုင်လ ၁၀ ရက်မှာ တရုတ်နိုင်ငံတောင်ပိုင်း ဖုကျန်းပြည်နယ်ထဲက ဖုကျိုးမြို့မှာ ဖြစ်ပွားခဲ့တာ ဖြစ်ပါတယ်။ ဒါပေမယ့်လည်း ကျူးလွန်စဉ်ကာလမှာ လူတွေ သတိထားမိခဲ့ခြင်း မရှိဘဲ ၂၀၁၆ ဖေဖော်ဝါရီလထဲမှာမှ ဒီမှုခင်းဖြစ်ပွားခဲ့ကြောင်း ပေါ်ပေါက်ခဲ့တာ ဖြစ်ပါတယ်။