„მეშინია ლაპარაკი არ დამავიწყდეს“ - მარტოკაცი ზვარეთიდან, რომელიც ცარიელ სოფელს უვლის

©️ www.Mtisambebi.ge - ზვარეთში მშობლების გარდაცვალების შემდეგ დაბრუნდა, 22 წლის წინ. სოფელი იცლებოდა. ზვარეთს შერჩენილი მოხუცები კვდებოდნენ ან შვილებს მიჰყავდათ ბარში. ახალგაზრდები ქალაქში გარბოდნენ. ის ფეხს აღარ იცვლიდა. ნანობს, სწავლის დასრულების შემდეგ თბილისში რომ დარჩა, ეგრევე რომ არ დაბრუნდა და ახალგაზრდობის წლებიც მშობლებთან არ გაატარა. 4 წლის წინ, სოფელში ორნიღა იყვნენ. ის და მისი მეზობელი, 62 წლის გიორგი. წელს გიორგიმაც დატოვა იქაურობა, ვეღარ გაძლო და გამოსაზამთრებლად ცაგერში წავიდა, დასთან. ასე შემორჩა ზვარეთს მარტოკაცად ვეფხია ერისთავი.